सेना प्रमुख जनरल उपेंद्र द्विवेदी पाकिस्तान ने भारत रे खिलाफ़ किण ई भांत री हिमाकत करण परां और करड़ी कार्यवाही सारू चेतायो है। जनरल द्विवेदी शुक्रवार ने श्रीगंगानगर कने सरहदी गाँव 22 एमडी मांय एक फौजी चौकी माथे फौजियां ने सम्बोधित कर रह्या हा। वे कह्यो के देश हर आतंकी हमला रो जवाब देवण सारू पूरी तरह तैयार है अर अब आतंकी हमलो व्हेवण री सूरत मांय दुश्मन ने और करड़ो जवाब दियो जावेला। जनरल द्विवेदी कह्यो के ऑपरेशन सिंदूर रे दौरान फौज ने देश री जनता री पूरी हिमायत मिली जिण ऊँ वां रो हौसला बुलंद रह्या। सेना प्रमुख कह्यो के फौज री कार्रवाई रा महत्त्व ने ध्यान राखता थकां प्रधानमंत्री नरेंद्र मोदी इण ने ऑपरेशन सिंदूर नाम दीनो हो। वे कह्यो के पाकिस्तान मांय आतंकी समूहां रा 9 ठिकाणा नष्ट करणो ऑपरेशन सिंदूर री खास सफलता ही। ईं मौके सेना प्रमुख ऑपरेशन सिंदूर रे दौरान बेहतरीन काम सारू तीन अहलकारां अर केई जवानां रो मान कीनो।