सूर्य रे उत्तरायण रो पर्व मकर संक्रांति बुधवार ने देश-प्रदेश मांय धार्मिक उच्छाव अर परम्परां रे सागे मनायो जा रह्यो है। लोग नदियां मांय पवित्र स्नान कर दान-पुण्य कर्या, पशुआं ने चारो खिलाया । वठिने मिन्दरां मांय भगवान ने तिल सूं बणी मीठाईयां रो भोग लगा रह्या है। प्रदेश मांय कई ठौड़ा माथे मकर संक्रांति रे मौके परम्परागत तरीकां ऊँ पतंगबाजी करी जा री है। जयपुर री विश्व प्रसिद्ध पतंगबाजी ने देखबा खातर बड़ी संख्या मांय सैलाणी पूग्या। पर्यटन महकमा री कानी ऊँ जल महल री पाळ माथे पतंग उत्सव राख्यो गयो। जिण मांय मुख्यमंत्री भजनलाल शर्मा अर उपमुख्यमंत्री दिया कुमारी पतंग उड़ा र लोगां ने संक्रांति री बधाई दी। मुख्यमंत्री आप रा संदेश मांय कह्या के यो पर्व आपसी मेल-मिलाप, उच्छाव अर सकारात्मक ऊर्जा रे सागे जीवन मांय नई उमंग भरबा रो दिन है। मकर संक्रांति रे मौके जयपुर मांय दिनभर खास उच्छाव रहवे है। अठे टाबरां रे सागे बड़ां लोग भी छतां माथे दिन भर पतंगबाजी रो मजो ले रह्या है। प्रदेश मांय रह रिया दक्षिण भारत रा लोग बुधवार ने परम्परागत तरीका ऊँ पोंगल रो तिवांर मनायो। दूजी कानी कोटा मांय बंगाली समाज रा लोग गंगा रो वाहन मान्या जाबा वाळो मगरमच्छ री मूर्ति री पूजा करी। इण मौके शहर मांय दिनभर पतंगबाजी रो दौर चाल रह्यो है। चूरू मांय भी दुकानदार इण मौके तुलादान कर्या। वठिने मारवाड़ हलका रा ज़िला मांय सुहागिनां 13 चीजा रा दान री प्रथा करी। भीलवाड़ा रा धनोप मांय रियासत काल सू चली आ री दड़ा प्रथा निभाई गई। इण रे जरिये गांववाळा आवता बरस री भविष्यवाणी बाबत् अटकला लगायी।