केंद्रीय माध्यमिक शिक्षा बोर्ड-सीबीएसई 12वीं अर दसवीं कक्षा रा इम्तिहान रा नतीजां रो ऐलाण कर दीनो है। मंगलवार ने जारी 12वीं रा नतीजां मांय 91 फीसदी ऊं बत्ती लड़कियां पास व्ही, जो लड़कां रे मुकाबले पांच दशमलव नौ-चार फीसदी बत्ती है। सीकर ज़िला रा लक्ष्मणगढ़ री खुशी शेखावत 500 मांय ऊं 499 अंक हासिल कीना। खुशी वां री कामयाबी पाछे मायतां अर शिक्षकां रो खास योगदान बतायो। दसवीं री परीक्षा मांय ई 95 फीसदी ऊं बत्ती लड़कियां पास व्हे ग्यी, जो लड़कां रे मुकाबले दो दशमलव तीन-सात फीसदी बत्तो है। ध्यानजोग है के ईं दफ़ा 12वीं कक्षा मांय 88 दशमलव तीन-नौ फीसदी, जदके मैट्रिक रा इम्तिहान मांय 93 दशमलव छह-छह फीसदी विद्यार्थी पास व्ह्या। प्रधानमंत्री नरेन्द्र मोदी सीबीएसई री 12वीं अर दसवीं री परीक्षा पास करण वाळा सगळा विद्यार्थियां ने बधाई दीनी है। प्रधानमंत्री सोशल मीडिया पोस्ट रे जरिये कह्यो के नतीजा विद्यार्थियां रा संकल्प, अनुशासन अर करड़ी मेहनत ने बतावे है। मुख्यमंत्री भजनलाल शर्मा ई परीक्षा मांय पास व्ह्या सगळा विद्यार्थियां रा बेहतर भविष्य री कामना कीनी है।