सिक्ख पंथ रा संस्थापक गुरु नानक देव जी रो 556 वों प्रकाश पर्व बुधवार ने धार्मिक उमाव रे साथे मनायो जावे। साल 1469 मांय कार्तिक महीना री पूर्णिमा रे दिन ननकाना साहिब मांय गुरु नानक जी रो जनम व्हीयो हो। वां रो जीवन, ईमानदारी, दयालुता अर लोगां री मदद रा महत्व ने दरसावे है। वां री शिक्षावां उण वगत री सामाजिक समस्यावां जिण मांय जाति बन्दोवस्त रे खिलाफ ही अर सगळा ने बरोबरी माथे जोर देवे ही। गुरु नानक जयंती माथे प्रदेशभर मांय सिक्ख पंथ रा लोगां अर पंजाबी समुदाय मांय उमाव देखी ज्यो। राजधानी जयपुर समेत न्यारा न्यारा जिलां रा गुरूद्वारां ने मोहवणा सजायी ज्या है। शबद कीर्तन अर लंगर प्रसादी रे साथे गुरूवाणी रा पाठ व्ह् रियो है। म्हारा श्रीगंगानगर खबरनवीस बतायो के वठै गुरूद्वारां मांय सेवादारां री भीड़ देखी जावे। गुरु नानक देव जी रा प्रकाश पर्व रे मौके केन्द्रीय मंत्री गजेन्द्र सिंह शेखावत जोधपुर मांय गुरुद्वारा श्री गुरु सिंह सभा मांय अरदास मांय हिस्सो लियो अर सेवादारी करी। वणा कयो के गुरु नानक देव जी रो जीवन आपां ने मानवता, सेवा अर सत्य रा मारग माथे चालण री सीख देवे है।