संसद ऑनलाइन गेमिंग संवर्धन और विनियमन विधेयक, 2025 पास कर दीनो है। राज्यसभा इण ने गुरूवार ने मंजूरी दीनी। ओ बिल ई-स्पोर्ट्स अर ऑनलाइन सोशल गेम्स ने बधावो देवेला अर नुकसानदायक ऑनलाइन मनी गेमिंग सेवावां, विज्ञापनां अर वां ऊं जुड्या माली लेन-देन माथे रोक लगावेला। बिल मांय ऑनलाइन गेमिंग प्राधिकरण बणावण रो ई प्रावधान करी ज्यो है। ऑनलाइन मनी गेमिंग ऊं जुड्या कानून नी मानण री सूरत मांय तीन साल तांई री कैद अर एक करोड़ रुप्या तांई रो जुर्मानो या दोन्यू सजा रो प्रावधान करी ज्यो है। इलेक्ट्रॉनिक्स अर सूचना प्रौद्योगिकी मंत्री अश्विनी वैष्णव बिल पेश करता थकां कह्यो के ऑनलाइन मनी गेमिंग समाज सारू खतरो बण ग्यो है अर हर साल 45 करोड़ लोग ऑनलाइन खेलां मांय करीब 20 हज़ार करोड़ रुप्या गमा देवे है। ऑनलाइन गेमिंग संवर्धन अर विनियमन बिल रो प्रदेश मांय ई स्वागत कर्यो जा रह्यो है। सवाईमाधोपुर री एक गृहिणी आशा शर्मा कह्यो के सरकार रा ईं फैसला ऊं समाज मांय गेमिंग री लत अर माली दगाबाज़ी री घटनावां माथे काबू कर्यो जा सकेला।