संसदीय कार्य, विधि अर न्याय मंत्री जोगाराम पटेल शुक्रवार ने जोधपुर मांय जनसुणवाई कीनी। वे शिक्षा, सड़क, ईलाज, बिजली, पाणी समेत जनता री न्यारी-न्यारी समस्यावां सुण र अहलकारां ने तुरत कार्यवाही करण रा हुकम दीना। भीलवाड़ा रा जिला कलेक्टर नमित मेहता शुक्रवार ने आसींद री शंभूगढ ग्राम पंचायत मांय जण सुणवाई कीनी। वे पीवण रा पाणी, बिजली, सड़कां री मरम्मत करावण अर हैंडपंप लगावण समेत 27 मामला मौके ई निपटाया। वे शंभूगढ़ पीएचसी, राजकीय उच्च माध्यमिक विद्यालय अर उपतहसील दफ्तर रो दौरो कर र व्यवस्थावां रो जायजो लीनो। हनुमानगढ़ मांय ई ज़िला कलेक्टर टिब्बी हलका रा सूरेवाला गांव मांय जनसुणवाई कर र बिजली, पाणी अर ईलाज रा सुबीता मुहैया करावण ऊं जुड़्या मामला बेगा निपटावण सारू अहलकारां ने ज़रूरी हुकम दीना। जनसुणवाई पाछे जिला कलेक्टर स्कूल परिसर मांय पौधा रोप र वां री सार-संभाळ करण बाबत् कह्यो। दौसा ज़िला री पीलोड़ी अर करोड़ी ग्राम पंचायतां मांय जिला कलक्टर जनसुणवाई कर र अहलकारां ने मामला तैय मियाद मांय निपटावण रा हुकम दीना। टोंक मांय ई ज़िला कलेक्टर पीपलू उपखंड रा निम्हेडा गांव मांय जनसुणवाई कर र अहलकारां ने जनता री परेशानियां बेगी दूर करण रा हुकम दीना।