श्री सी.पी. राधाकृष्णन देश रा 15वां उपराष्ट्रपति रा तौर ऊं शुक्रवार ने शपथ लीनी। राष्ट्रपति द्रौपदी मुर्मू श्री राधाकृष्णन ने राष्ट्रपति भवन राख्यी ज्या जळसा मांय ओहदा री शपथ दिरायी। ईं मौके प्रधानमंत्री नरेन्द्र मोदी, पैली वाळा राष्ट्रपति रामनाथ कोविंद, पैली वाळा उपराष्ट्रपति जगदीप धनखड़ अर गृहमंत्री अमित शाह समेत केई केन्द्रीय मंत्री मौजूद रह्या। मुख्यमंत्री भजनलाल शर्मा ई कार्यक्रम मांय शामिल व्ह्या। श्री चंद्रपुरम पुन्नासामी राधाकृष्णन 4 मई 1957 ने तमिलनाडू मांय जन्म्या। वे कपड़ा ने दिसावर मांय बेचण रो कारोबार कामयाबी सागे बखूबी कीनो। पढ़ाई पूरी कर्यां पाछे वे सरूआती दिनां मांय राष्ट्रीय स्वयं सेवक संघ ऊं जुड़ ग्या। श्री राधाकृष्णन साल 1996 मांय तमिलनाडू भाजपा रा सचिव री जिम्मेदारी संभाळी। 1998 मांय वे कोयम्बटूर ऊं सांसद चुण्यी ज्या। वे झारखंड अर महाराष्ट्र रा राज्यपाल रा तौर ऊं ई सेवा कीनी। उपराष्ट्रपति राधाकृष्णन अमेरिका, इंग्लैण्ड, फ्रांस अर जर्मनी समेत करीब 25 देशां री यात्रा कर चुक्या है। वे टेबिल टेनिस मांय कॉलेज रा चैंपियन अर लम्बी दूरी री दौड़ मांय ई भाग लेता रह्या। प्रधानमंत्री नरेन्द्र मोदी सोशल मीडिया रे जरिये बधाई संदेश मांय कह्यो के श्री राधाकृष्णन लोकतांत्रिक मूल्यां ने मज़बूत बणावण अर समाज सेवा सारू जिन्दगी लगा दीनी। प्रधानमंत्री श्री राधाकृष्णन ने कामयाब कार्यकाल री शुभकामनावां दीनी।