वोटर लिस्टां रा विशेष गहन पुनरीक्षण-एस आई आर रा तैत वां रा डिजिटाईजेशन पाछे मैपिंग मांय ई राजस्थान देश मांय अव्वल बण ग्यो है। प्रदेश मांय वोट देवण रा पात्र लोगा मांय ऊँ हाल तांई 78 फीसदी रो मिलान जूनी वोटर लिस्टां ऊँ व्हे ग्यो है। आं मतदातावां ने अब किणी भांत रा कागज़ात पेश करण री ज़रूरत नी है। मुख्य निर्वाचन अधिकारी नवीन महाजन आ जाणकारी दीनी। वे बतायो के प्रदेश रा नौ हजार ऊँ बत्ता मतदान केन्द्रां माथे बूथ लेवल अहलकार सौ फीसदी काम पूरो कर लीनो है। महाजन बतायो के टेमसर काम पूरो करण वाळा करबी अढ़ाई हजार बीएलओ रो मान करी ज्यो है। श्री महाजन कह्यो के मैपिंग ने बधा र 85 फीसदी रा लेवल तांई पूगावणो तैय करी ज्यो है। ईं बीचे एस आई आर रा दूजा दौर रा तैत 50 करोड़ 68 लाख ऊं बत्ता गणना प्रपत्र बांट दिया ज्या है, जो ईं दौर मांय शामिल वोट देवण रा पात्र करीब 51 करोड़ लोगां री तादाद रो 99 दशमलव चार-तीन फीसदी है। एस.आई.आर रा दूजा दौर रा तैत 4 नवंबर ऊँ चार दिसम्बर बीचे राजस्थान, छत्तीसगढ़, गोवा, गुजरात, केरल, मध्यप्रदेश, तमिलनाडु, उत्तर-प्रदेश, पश्चिम बंगाल, पुद्दुचेरी, लक्षद्वीप, अंडमान अर निकोबार द्वीप समूह मांय खास अभियान चलायी ज्यो है। पुनरीक्षण रो काम आवता साल 7 फरवरी ने वोटर लिस्टां री छपाई सागे पूरो व्हेला।