भारतीय प्रशासनिक सेवा रा ठावा अहलकार वी. श्रीनिवास सोमवार ने राज्य रा नुवा मुख्य सचिव रा रूप मांय आपरो कामकाज संभाळ लियो। जयपुर रा शासन सचिवालय मांय कोई साढ़े तीन बज्यां जावण वाळा मुख्य सचिव सुधांश पंत वां ने कामकाज सूंप्यो। ईं मौके प्रशासनिक अर दूजी सेवा रा केई अहलकार मौजूद रिया। पछे खबरनवीसां ऊं बतळ मांय श्रीनिवास कयो के प्रदेश री विकास दर ने बधावो देवण अर विकसित राजस्थान 2047 रा संकल्प ने धरातल माथे उतारणो वां री प्राथमिकता रहवेला। वणा कयो के राजस्थान रा केई नवाचारां ने केन्द्र सरकार ई अपणाया है। जिण हलका मांय प्रदेश रो प्रदर्शन कमजोर है वां ने ई सुधारण सारू कोशिश करी जाएला। इण रे पछे सचिवालय मांय व्ह्या कार्यक्रम मांय जावण वाळा मुख्य सचिव सुधांश पंत ने विदाई दीरीजी।