विधायक निधि कोष ऊं रकम जारी करण सारु कमीशन री मांग रा मामला री जांच रा तैत विधानसभा री सदाचार समिति शुक्रवार ने आरोपित तीन ई विधायकां ऊं न्यारी-न्यारी पूछताछ करी। विधानसभा परिसर मांय संवारे 11 बज्यां सरू व्ही पूछताछ सारु सब ऊं पैली निर्दलीय विधायक ऋतु बनावत, वां पाछे कांग्रेस री विधायक अनिता जाटव अर आखिर मांय भारतीय जनता पार्टी रा विधायक रेवंतराम डांगा ऊं पूछताछ करी ज्यी। समिति आरोपित विधायकां ऊं वां रे दोषी नी व्हेवण रा सबूत मांग्या। आरोपित विधायक ज़रूरी सबूत देवण सारु बगत मांग्यो, जिण ने समिति मंजू़री दे दीनी। ईं पाछे खबरनवीसां सागे बातचीत करता थकां सदाचार समिति रा अध्यक्ष कैलाश चंद वर्मा कह्यो के रेवंतराम डांगा 15 दिन, अनीता जाटव 7 दिन अर ऋतु बनावत 10 दिन रो बगत मांग्यो।