विधानसभा बुधवार ने कोचिंग सेंटर नियंत्रण अर विनियमन बिल पास कर दीनो। उपमुख्यमंत्री अर उच्च अर तकनीकी शिक्षा मंत्री डॉ. प्रेमचंद बैरवा बिल पेश कीनो। ओ बिल पास व्ह्या पाछे कोचिंग संस्थान विद्यार्थियां ऊं मनमानी फीस नी ले सकेला। डॉ. बैरवा एक सवाल रा जवाब मांय सदन ने जाणकारी दीनी के राज्य मांय बेगी ई मोटर व्हीकल एग्रीगेटर पॉलिसी लाई जावेला। सड़क परिवहन अर राजमार्ग मंत्रालय री ओर ऊं लारला दिनां जारी करीजी गाइड लाइन रे मुताबिक राज्य सरकार ईं नीति माथे काम कर रही है। वे प्रदेश रा लाइसेंसशुदा एग्रीगेटर्स ऊं मिली जाणकारी रे अनुसार सार्वजनिक परिवहन सारू कैब कम्पनियां रो जिलेवार ब्यौरो ई दीनो। विधानसभा मांय राजस्थान स्वास्थ्य विज्ञान विश्वविद्यालय संशोधन बिल 2025 ई पास करी ज्यो। संसदीय कार्यमंत्री जोगाराम पटेल खबरनवीसां सागे बातचीत करता थकां कह्यो के चिकित्सा सेवावां ने बेहतर बणावण सारू ज़रूरी जतन कर्या जावेला। इण ऊं पैली स्मार्ट मीटर रा मुद्दा माथे सदन मांय जोरदार हंगामो व्ह्यो।