विदेश मंत्रालय भारत री फौज कानी ऊं चलाया जा रह्या ऑपरेशन सिंदूर रा बारा मांय अब ऊं थोड़ी देर पैली खबरनवीसां ने जाणकारी दीनी। विदेश सचिव विक्रम मिसरी, मंत्रालय रा प्रवक्ता रणधीर जायसवाल, कर्नल सोफिया कुरैशी अर विंग कमांडर व्योमिका सिंह बीती रात पाकिस्तान री ओर ऊं करी ज्या हमलां अर भारत री जवाबी कार्यवाही रा बारा मांय जाणकारी दीनी। कर्नल सोफिया कुरैशी बतायो के पाकिस्तान री ओर ऊं करी ज्या सगळा मिसाइल अर ड्रोन हमला नाकाम कर दिया ज्या। ईं मौके विदेश सचिव कह्यो के आतंकवाद रा केन्द्र रा तौर ऊं पाकिस्तान रो चेहरो पूरी दुनिया सामी आ ग्यो है। वे कह्यो के पाकिस्तान भारत रा फौजी ठिकाणा ने निशाणो बणावण री कोशिशां कीनी, ज्यां रो मुंहतोड़ जवाब दियो ज्यो। मुख्यमंत्री भजनलाल शर्मा भारत-पाक बीचे तणा-तणी रा हालात ने ध्यान राखता थकां शुक्रवार ने कैबिनेट री मीटिंग लीनी। ईं दौरान राज्य रा सरहदी हलकां मांय करी जा रही तैयारियां रो जायजो लियो ज्यो। मीटिंग पाछे उपमुख्यमंत्री डॉ. प्रेम चंद बैरवा अर संसदीय कार्य मंत्री जोगाराम पटेल खबरनवीसां सागे बातचीत कर र मीटिंग मांय करी ज्या विचार रा बारा मांय जाणकारी दीनी। सरहदी ज़िलां मांय ईलाज, स्वास्थ्य, ईंधन, खाण-पीण री सामग्री अर दूजी ज़रूरी चीजां रो स्टॉक राख्यो जा रह्यो है। मंत्री बतायो के एस.डी.आर.एफ. री टुकड़ियां ने ई सरहदी हलकां सारू रवाना करी ज्यी है। पाकिस्तान ऊं लाग्योड़ी सरहद माथे चाल रही तणा-तणी ने ध्यान राखता थकां सरहद कने रा ज़िलां मांय हिफ़ाज़त सारु केई एहतियाती उपाय कर्या जा रह्या है। म्हाणा खबरनवीस बतायो के बाड़मेर, जैसलमेर, बीकानेर, फलौदी, जोधपुर अर श्रीगंगानगर मांय आगला हुकम तांई रात ऊं आगली भोर तांई लाइटां नी जळायी जा सकेला। सरहदी ज़िलां मांय बाज़ार बेगा ई बंद करण अर लाइटां नी जळावण रा हुकम री पूरी पालना करण रा निर्देश दिया ज्या है। ईं सागे ई सरहद ऊं लाग्योड़ा ज़िलां मांय ड्रोन उड़ावण अर पटाखा चलावण माथे आगला हुकम तांई रोक लगा दीरीजी है। जैसलमेर ज़िला मांय जनता ने ड्रोन पुलिस थाणा मांय जमा करावण रा हुकम दिया ज्या है। सरहदी ज़िलां मांय रीता ओहदां माथे अहलकारां अर कर्मचारियां ने तैनात कर्या जा रह्या है। चिकित्सा, नागरिक आपूर्ति, सार्वजनिक निर्माण, पेयजल अर आपदा प्रबंध विभाग आपातकालीन हालात री सूरत मांय ज़रुरी तैयारियां कर रह्या है। ईं बीचे, सरहदी हलकां मांय रेलां री आवण-जावण माथे असर पड़्यो है अर कुछ रेलां रद्द कर दीरीजी है। जोधपुर रेंज रा पुलिस महानिरीक्षक विकास कुमार बतायो के लोगां ने खास सावचेती राखण अर युद्ध रा काम री ठोड़ां ऊं दूर रेहवण री राय दीरीजी है। मौजूदा हालात ने ध्यान राखता थकां जयपुर जिला मुख्यालय परां नागरिक सुरक्षा अर आपदा राहत नियंत्रण कक्ष रो काम बेहतर तरीका ऊं चलावण सारु तीन टीमां बणायी ज्यी है। जिला कलेक्टर डॉ. जितेन्द्र कुमार सोनी नियंत्रण कक्ष तीन पारियां मांय चलावण रा हुकम दीना है।राजस्थान स्टेट गैस लिमिटेड प्रदेश मांय सी.एन.जी. टेशनां माथे हिफ़ाज़ती मानकां री करड़ाई ऊं पालना करण रा हुकम दीना है। सीएनजी टेशनां अर संवेदनशील ठौड़ां गैर-ज़रूरी लोगां रे दाखिल व्हेवण माथे रोक लगावण बाबत् कही ज्यो है। ईं सागे ई आर.एस.जी.एल. रा प्रबंध निदेशक रणवीर सिंह कर्मचारियां ने सोशल मीडिया रे ज़रिए गैर-ज़रुरी प्रतिक्रिया देवण ऊं बचण सारु कह्यो है। देश री सरहद री हिफ़ाज़त मांय लाग्योड़ा फौजियां रा मान मांय कांग्रेस पार्टी री ओर ऊं शुक्रवार ने जयपुर मांय तिरंगा यात्रा निकाळी ज्यी। ईं दौरान देशभक्ति रा गीतां सागे तिरंगो झण्डो लहराता थकां लोग शहर रा न्यारा-न्यारा गेलां ऊं पैदल मार्च निकाळ्यो। ईं मार्च रो मकसद जनता ने एकजुट रेहवण रो संदेश देवणो अर वीर फौजियां रो हौसलो बधावणो हो।