लौहपुरूष सरदार वल्लभभाई पटेल री डोढ सौ वीं जयंती रे मौके शुक्रवार ने वां ने सिरधाभाव सागे याद कर्या जा रह्या है। वे देश रा पहला उपप्रधानमंत्री अर गृहमंत्री ई हा। ईं मौके प्रधानमंत्री नरेन्द्र मोदी जनता ऊं एकजुट व्हे र देश री प्रगति सारु खुद ने समर्पित करण री अपील कीनी। वे शुक्रवार ने सरदार पटेल री जयंती रे मौके गुजरात मांय केवड़िया रा एकता नगर मांय राख्यी ज्या राष्ट्रीय एकता दिवस समारोह मांय बोल रह्या हा।
ईं मौके जयपुर मांय ई एकता मार्च निकाळी ज्यो। इण मांय मुख्यमंत्री भजन लाल शर्मा नौजवानां ऊं देश रा भला अर ऐका ने सब ऊं ऊंचो मानण री अपील कीनी। मुख्यमंत्री कह्यो के सरदार पटेल रियासतां ने एक कर र मज़बूत देश बणायो अर अब नौजवानां ने खुद रे पाण ऊबो भारत बणावण रा काम मांय सक्रिय भागीदारी निभावणी चाहिजे। श्री शर्मा कह्यो के सरकार नौजवानां ने मज़बूत बणावणो तैय कीनो है। वे कह्यो के लारला दो साल मांय नौजवानां ने 91 हज़ार ऊं बत्ती सरकारी नौकरियां दीरीजी अर डोढ़ लाख ऊं बत्ता ओहदां माथे भर्ती रो काम चाल रह्यो है। मुख्यमंत्री गांधी सर्किल ऊं अमर जवान ज्योति तांई करीब 3 किलोमीटर पैदल मार्च ई कीनो। प्रदेश रा न्यारा-न्यारा ज़िला मांय एकता दौड़ राख्यी ज्यी, ज्यां मांय मोटी तादाद मांय लोग भाग लीनो। केन्द्रीय संचार ब्यूरो कोटा री ओर ऊं बूंदी शहर मांय लगायी ज्यी दो दिन री मल्टीमीडिया प्रदर्शनी ई शुक्रवार ने पूरी व्ही।