लोकसभा अध्यक्ष ओम बिरला सोमवार ने कोटा रा एमबीएस अस्पताल परिसर मांय प्रदेश रा तीजा दिव्याशा केन्द्र रो उद्घाटन कीनो। ईं केन्द्र रे मार्फत दिव्यांगजन अर बुजुर्गां री मदद सारु 30 ऊं बत्ती भांत रा साज-ओ-सामान मुहैया कराया जावेला। कार्यक्रम मांय श्री बिरला 99 दिव्यांगजन अर 127 बुजु़र्गां ने उपकरण ई दीना। ईं मौके श्री बिरला कोटा मांय 15 करोड़ रुप्या रा खर्च ऊं नुवो दिव्यांगजन पार्क बणावण रो ऐलाण कीनो। इण मांय योग केन्द्र अर कसरत करण र ठौड़ समेत न्यारा-न्यारा सुबीता मुहैया कराया जावेला। कार्यक्रम मांय श्री बिरला कह्यो के ओ दिव्याशा केन्द्र उपकरण वितरण केन्द्र व्हेवण सागे दिव्यांगजन रा खुद रा मान रो ज़रियो बणेला। श्री बिरला दिव्याशा केन्द्र री मानवीय पहल सारु प्रधानमंत्री नरेन्द्र मोदी रो आभार जतायो। लोकसभा अध्यक्ष मस्कुलर डिस्ट्रॉफी बीमारी रे कारण मान्दा बच्चां रा ईलाज़ बाबत् राज्य सरकार री कोशिशां री ई सराहवणा कीनी। वे मुख्यमंत्री इलेक्ट्रिक व्हील चेयर योजना रा तहत ऑटोमेटेड मोटरसाइकिल मुहैया करावण रा फैसला माथे कह्यो के इण ऊं दिव्यांगजन री ज़िन्दगी मांय मोटा बदलाव आवेला। ध्यानजोग है के जयपुर अर टोंक मांय दिव्याशा केन्द्र पेली ई काम कर रह्या है।