रेल मंत्री अश्विनी वैष्णव कह्यो है के राज्य मांय रेलां रा विकास सारू 55 हज़ार करोड़ रूप्या रा खर्चा वाळा काम चाल रह्या है। वे कह्यो के राज्य ने रेलवे मांय विकास सारू 10 हजार करोड़ रूप्या रो बजट दियो ज्यो है। वे थावर ने जैसलमेर मांय खबरनवीसां सागे बातचीत करता थकां आ जाणकारी दीनी। रेल मंत्री कह्यो के सरहदी हलकां मांय रेल नेटवर्क ने मज़बूत करण सारू अनूपगढ़-जैसलमेर-बाड़मेर ने जोड़बा री खास योजना बणायी जा रही है। रेल मंत्री थावर ने जैसलमेर-दिल्ली बीचे नुवी एक्सप्रेस रेलगाड़ी ने जैसलमेर ऊँ हरी झंडी बता र रवाना कीनी। आ गाड़ी 1 दिसम्बर ऊँ रोजीना चालेला। नुवी गाड़ी जैसलमेर ऊँ आशापुरा, रामदेवरा, फलौदी, मारवाड़ जंक्शन, जोधपुर, जयपुर अर अलवर व्हेती दिल्ली रा शकूरबस्ती टेशन पूगेला। गाड़ी ने रवाना कर्यां पाछे वैष्णव कह्यो के ईं गाड़ी ऊँ दिल्ली तांई रो सफ़र आसाण बणबा सागे सैर-सपाटा ने ही बधावो मिलेला। ईं बीचे अमृत स्टेशन योजना रा तहत पाली ज़िला रा मारवाड़ जंक्शन टेशन माथे विकास रा करीब 18 करोड़ रुप्या रा खर्च वाळा काम कर्या जा रह्या है।