रेल मंत्री अश्विनी वैष्णव कह्यो है के राजस्थान सारू रेलवे बजट मांय करीब 14 गुना बधोतरी करीजी है। वे गुरूवार ने जयपुर मांय खबरनवीसां सागे बातचीत कर रह्या हा। श्री वैष्णव कह्यो के राज्य मांय 55 हजार 452 करोड़ रुप्या रा खर्च वाळी न्यारी-न्यारी रेल परियोजनावां माथे अर 85 टेशनां ने और बेहतर बणावण रो काम चाल रह्यो है। रेलमंत्री कह्यो के बेगी ई जयपुर अर बीकानेर ऊं दिल्ली बीचे नुवी वंदे भारत गाड़ियां चलायी जावेला। मंत्री बतायो के जैसलमेर -दिल्ली बीचे रात ने चालण वाळी नुवी रेलगाड़ी चलावण रा बारा मांय ई विचार कर्यो जा रह्यो है। श्री वैष्णव कह्यो के जयपुर कने खातीपुरा टेशन माथे मेगा मेंटेनेंस केंद्र बणायो जा रह्यो है, जिण ऊं स्थानीय स्तर माथे नौकरी-धंधा रा नुवा मौका मिलेला।
रेल मंत्री गुरूवार ने अमृत भारत स्टेशन योजना रा तैत और बेहतर बणाया जा रह्या जयपुर जंक्शन रो दौरो कीनो। ईं दौरान वे न्यारा-न्यारा कामां रो जायजो लीनो। केंद्रीय मंत्री वंदे भारत अनुरक्षण शैड रो ई उद्घाटन कीनो। श्री वैष्णव इण ई योजना रा तैत और चोखो बणाया जा रह्या गांधीनगर, जयपुर टेशन रो ई दौरो कीनो अर वठे चाल रह्या विकास रा कामां रो जायजो लीनो।
वे लघु उद्योग भारती कानी ऊं राख्यी ज्या आइडियाथॉन-2025 रा समापन सत्र मांय ई शामिल व्ह्या। श्री वैष्णव कह्यो के आत्मनिर्भर अर ’मेक इन इंडिया’ पहल ऊं देश तेज़ी ऊं आईटी अर इलेक्ट्रॉनिक विनिर्माण केंद्र रा तौर ऊं सामी आ रह्यो है। केन्द्रीय मंत्री कह्यो के आईटी हलका मांय भारत री प्रगति री चर्चा पूरी दुनिया मांय व्हे रही है। वे बतायो के देश मांय इलेक्ट्रॉनिक विनिर्माण उद्योग साढे 11 लाख करोड़ रुप्या ऊं बत्तो व्हे ग्यो है, जिण मांय 25 लाख ऊं बत्ता लोगां ने नौकरी-धंधा रा मौका मिल रह्या है। श्री वैष्णव कह्यो के लघु उद्योग भारती सागे मिल र पांच हजार नौजवानां ने इलेक्ट्रॉनिक सामान बणावण री सिखावण दी जावेला।
वे कह्यो के जयपुर मांय राज्य सरकार री मदद ऊं इन्क्यूबेशन सेंटर विकसित कर्यो जावेला। केन्द्रीय मंत्री मुख्यमंत्री भजनलाल शर्मा सागे वां रा रेहवास माथे मुलाकात कर र न्यारा-न्यारा मुद्दां माथे चर्चा कीनी।