राष्ट्र, 15 जनवरी ने देश रा स्वाभिमान अर आन-बान ने प्रदर्शित करतो सेना दिवस मनावेला। इण टेम सेना दिवस री मुख्य परेड़ जयपुर मांय राख्यी जा री है। इण मौके जगतपुरा मांय महल रोड़ माथे देश रा गौरव अर शक्ति ने प्रदर्शित करती आर्मी परेड़ राख्यी जावेला। जिण मांय भारतीय सेना रा जवान आप रा शौर्य अर पराक्रम री छटा दिखावेला। इण दौरान सेना री आधुनिक सैन्य अर युद्धक क्षमता दिखायी जावेला। स्वदेशी तकनीक सूं विकसित मिसाइल प्रणालियां, अत्याधुनिक टैंक, सैन्य वाहन, ड्रोन, एंटी एयर अर एंटी टैंक हथियारां रे जरिये सेना री सामरिक शक्ति री जीवंत झांकी दिखायी जावेला। ऑपरेशन सिंदूर री झांकी, ब्रह्मोस मिसाइल, हेलिकॉप्टर आधारित हथियार प्रणाली अर रोबोटिक डॉग्स भी इण परेड़ रो खास आकर्षण व्हेला। आर्मी परेड़ बाबत् जिला प्रशासन अर सेना रा आला अहलकार बुधवार ने शहर रो दौरो कर र व्यवस्थावां रो जायजो कर्यो। मुख्यमंत्री भजनलाल शर्मा आर्मी डे परेड़ रा जयपुर मांय व्हे रह्या आयोजन ने प्रदेशवासियां खातर गर्व री बात बताता थकां इण ने प्रदेश री शौर्य गाथा ने आगे ले जाबा वाळो कदम बताया। वे कह्या के ओ ऐतिहासिक आयोजन, राष्ट्रभक्ति, सम्मान अर गौरव री भावना ने नुवी ऊँचाइयां तांई ले जावेला।