राष्ट्र गीत वंदे मातरम् रा डोढ़ सौ साल पूरा व्हेवण रा जश्न रा सिलसिला मांय प्रदेश मांय न्यारी-न्यारी ठोड़ां सोमवार ने ई कार्यक्रम राख्यी ज्या। जयपुर रा शासन सचिवालय मांय राख्यी ज्या खास कार्यक्रम मांय मुख्य सचिव सुधांश पंत कह्यो के वंदे मातरम् गीत डोढ़ सौ साल मांय देश री सांस्कृतिक, आध्यात्मिक अर राष्ट्रवादी चेतना ने बधावो दीनो है। वे कह्यो के केंद्र सरकार ईं गीत रा ऐतिहासिक महत्त्व रा बारा मांय जाग जगावण सारू राष्ट्रीय स्मृति पहल सरू कीनी है। ईं दौरान सचिवालय परिसर मांय एक स्थान, एक समय, एक गीत थीम माथे अहलकार अर कर्मचारी मिल र ’वंदे मातरम्’ गीत गायो अर खास तौर ऊं देश मांय बण्योड़ा सामान खरीदण री शपथ लीनी। जयपुर मांय पशुपालन विभाग अर पाली मांय जलदाय विभाग मांय दफ्तरां मांय ई अहलकार अर कर्मचारी मिल र राष्ट्र गीत गायो। झुंझुनूं कलेक्ट्रेट परिसर मांय राख्यी ज्या कार्यक्रम मांय जिला कलेक्टर डॉ. अरुण गर्ग कह्यो के म्हाने आज़ादी री लड़ाई लड़बा वाळां रा बलिदान पाछे आज़ादी मिली है अर म्हाणी सेवा, समर्पण अर ईमानदारी सागे काम करण री ज़िम्मेदारी है।