रविवार ने राष्ट्रीय हिन्दी दिवस देश-प्रदेश मांय समारोहपूर्वक मनायो गयो। राजभाषा हिन्दी रे प्रचार प्रसार अर दैनिक जीवन मांय इण रे बत्ती ऊं बत्ती उपयोग खातिर न्यारी-न्यारी जागरूकता गतिविधियां राखीजी। हिन्दी दिवस माथै प्रधानमंत्री नरेंद्र मोदी देशवासियां ने शुभकामनावां देवता थकां कयो कि हिन्दी केवल संवाद रो माध्यम नीं है, आ देश री पहचाण अर मूल्यां री जीवंत विरासत भी है। सोशल मीडिया पोस्ट मांय श्री मोदी लोगां सूं अरज करी है कि वे हिन्दी साथै सगळी भारतीय भाषावां ने समृद्ध बणावे अर आं ने भावी पीढ़ी तांई पहुंचाणे रो संकल्प लेवे।
गृहमंत्री अमित शाह हिन्दी ने और आसान बणाणे अर इण रे साथे क्षेत्रीय भाषावां रे सह-अस्तित्व ने बधावो देणे री अरज करी है। गुजरात रा गांधीनगर मांय पाँचवां अखिल भारतीय राजभाषा सम्मेलन मांय श्री शाह लोगां सूं मातृभाषा रो सम्मान करता व्हीया हिंदी रो समर्थन करणे रो हेलो कर्यो। वणा कयो कि केंद्र सरकार हिन्दी ने और बत्ती लोगां तांई पहुंचाणे खातिर सारथी मंच अर हिंदी शब्द सिंधु कोश री सरूआत करी है। श्री शाह कयो कि हिंदी ने विज्ञान, प्रौद्योगिकी, न्याय अर पुलिस री भाषा भी बणाणो व्हेला।
अठी ने हिन्दी दिवस माथै राज्य स्तरीय कार्यक्रम जयपुर मांय राख्यो गयो। कार्यक्रम मांय उपमुख्यमंत्री प्रेमचंद बैरवा हिन्दी री विविध विद्यावां अर साहित्य मांय लेखकां ने हिन्दी सेवा पुरस्कार प्रदान करया। जयपुर जिला कलेक्टर डॉ. जितेन्द्र सोनी ने वांणे यात्रा वृतांत खातिर पुरस्कार दियो गयो। कार्यक्रम मांय इण बरस राजस्थान माध्यमिक शिक्षा बोर्ड री 10वीं अर 12वीं री परीक्षा मांय हिन्दी मांय सौ-फीसदी अंक लावण वाळा पढेसरियां ने भी पुरस्कृत करयो गयो। इण मौके माथे आपरे सम्बोधन मांय डॉ. बैरवा कयो कि हिन्दी ने राजभाषा सूं जनजन री भाषा बणावण खातिर सगळा री जिम्म्ेदारी है। वणा अहलकारां सूं दैनिक कामकाज हिन्दी मांय बत्ती ऊं बत्ती उपयोग करणे रो हेलो कर्यो है। हिन्दी दिवस माथै न्यारा न्यारा जिला मांय भी संगोष्ठियां अर होड़ा राखीजी।