राष्ट्रीय सड़क सुरक्षा माह रा तैत प्रदेशभर मांय वाहन रैली, समझाइश अर नुक्कड़ नाटक समेत भांत-भांत रा कार्यक्रम राख्या जा रह्या है। जयपुर मांय परिवहन विभाग री ओर ऊं जागरुकता अभियान चलायो जा रह्यो है। जयपुर रा प्रादेशिक परिवहन अधिकारी राजेंद्र सिंह शेखावत आकाशवाणी ने बतायो के पूरा महीना लोगां ने सड़क सुरक्षा अर यातायात नियमां री पालना करण रा बारा मांय जाणकारी दी जावेला। श्री शेखावत बतायो के जयपुर रा गांवाई अर शहरी हलकां मांय एक लाख जणां ने मास्टर ट्रेनर बणावणो तैय करी ज्यो है। ईं बीचे पाली मांय बुधवार ने सूरजपोल चौराहा अर नहर पुलिया समेत न्यारी-न्यारी ठौड़ां लोगां ने सड़कां माथे हिफाजत ऊं जुड़्या नियमां, सीटबेल्ट, हेलमेट अर स्पीडलिमिट रा बारा मांय जाणकारी दीरीजी। म्हाणा खबरनवीस बतायो के ईं सागे ई गाड़ियां माथे रात ने चमकण वाळा स्टीकर लगायी ज्या।