राष्ट्रीय गीत “वंदे मातरम्“ रा डोढ़ सौ बरस पूरा व्हेवण रे मौके एक साल तांई चालण वाळा स्मरण उत्सव रो प्रधानमंत्री नरेन्द्र मोदी शुक्रवार ने नई दिल्ली मांय उद्घाटन कीनो। नई दिल्ली रा इंदिरा गांधी इंडोर स्टेडियम मांय राख्यी ज्या जळसा मांय प्रधानमंत्री कह्यो के वंदे मातरम् एक मंत्र, ऊर्जा, सपनो अर संकल्प है। ईं मौके श्री मोदी यादगार डाक टिकट अर सिक्को ई जारी कीनो। वे vandemataram150.in पोर्टल ई सरू कीनो। इण मांय लोग राष्ट्रीय गीत गाता थकां वीडियो अपलोड कर र सर्टिफिकेट हासिल कर सके है। ईं मौके प्रदेश मांय ई केई कार्यक्रम राख्यी ज्या। राज्य स्तर रो जळसो जयपुर मांय राख्यी ज्यो। मुख्यमंत्री भजनलाल शर्मा फूंकणा उड़ा र इण री सरूआत कीनी। ईं दौरान वे कह्यो के “वंदे मातरम् म्हाणी भेळी चेतना री निशाणी है।“कोटा मांय राख्यी ज्या कार्यक्रम मांय लोकसभा अध्यक्ष ओम बिरला कह्यो के वंदे मातरम् भारत री आत्मा अर एका रो दरसाव करे है। श्री बिरला इण ने संकल्प रो दिन बताता थकां खुद रे पाण ऊबो भारत बणावण रो संकल्प दोहरायो। जळसा मांय मौजूद सगळा लोग मिल र वन्दे मातरम् गीत गायो। भीलवाड़ा मांय जागरूकता रैली निकाळी ज्यी, जदके किशनगढ़ कने बांदर सिंदरी रा केंद्रीय विश्वविद्यालय मांय खास कार्यक्रम राख्यी ज्यो। जैसलमेर मांय प्रभातफेरी निकाळी ज्यी। न्यारा-न्यारा सरकारी दफ्तरां मांय वन्दे मातरम् गीत गायी ज्यो। आकाशवाणी रा जयपुर केन्द्र मांय ई अहलकार अर कर्मचारी वन्दे मातरम् गीत गायो। प्रधानमंत्री नरेन्द्र मोदी शुक्रवार ने राष्ट्रीय गीत ‘‘वंदे मातरम्’’ री डोढ़ सौ वीं वर्षगांठ रे मौके केन्द्रीय गृह मंत्री अमित शाह रो लेख साझा कीनो। सोशल मीडिया पोस्ट मांय श्री मोदी मांड्यो के ईं लेख मांय सांस्कृतिक गौरव अर सभ्यतागत राष्ट्रवाद रा मिश्रण, वंदे मातरम् गीत रे जाग जगावण रो प्रभात गीत बण जावण रो जिकर करी ज्यो। प्रधानमंत्री कह्यो के लेख मांय ओ ई बतायी ज्यो है के वंदे मातरम् गीत साल 2047 तांई भारत ने भरोसेमंद, खुद रे पाण ऊबो अर ओजू अव्वल विकसित देश बणावण रो सपनो सांचो करण री सीख देतो रहवेला।