राष्ट्रीय एकता अर स्वदेशी रा संकल्प ने बढ़ावो देबा अर राष्ट्रीय गीत वंदे मातरम् रा 150 बरस पूरा होबा रे मौके प्रदेशभर मांय न्यारा-न्यारा कार्यक्रम कर्या जा रह्या है। इणी कड़ी मांय बाड़मेर मांय दीतवार ने प्रभात फेरी अर दुपहिया गाड़ियां री रैली काड़ी गई। सागे ही जिला सफाखाना परिसर मांय रक्तदान शिविर राख्यो गयो। शहर रा भगवान महावीर टाउन हॉल मांय राखी सांस्कृतिक संध्या मांय स्वतंत्रता सैनानियां अर शहीदां रा घराळा रो सम्मान कर्यो जा रह्यो है। वठीने बालोतरा मांय भी तिरंगा रैली काड़ी गई।