देश आज पहलो राष्ट्रीय अंतरिक्ष दिवस मना रह्यो है। ईं मौके नई दिल्ली मांय राख्यी ज्या खास कार्यक्रम रो राष्ट्रपति द्रौपदी मुर्मू उद्घाटन कीनो। वे कह्यो के भारतीय अंतरिक्ष अनुसंधान संगठन -इसरो अंतरिक्ष हलका सागे देश रा सामाजिक अर माली विकास मांय ई अमूल्य योगदान दीनो है। राष्ट्रपति कह्यो के अंतरिक्ष रा हलका मांय बधवार ऊं इंसान रो बूतो बध्यो है अर ब्रह्मांड रा रहस्य उजागर करण मांय मदद मिली है। ईं मौके अंतरिक्ष राज्य मंत्री डॉ. जितेन्द्र सिंह ई मौजूद हा। कार्यक्रम मांय राष्ट्रपति इसरो रा रोबोटिक्स चुनौती अर भारतीय अंतरिक्ष हैकाथॉन जीतण वाळां ने ईनाम दे र नवाज़ा। उपराष्ट्रपति जगदीप धनखड़ अर प्रधानमंत्री नरेन्द्र मोदी पहला राष्ट्रीय अंतरिक्ष दिवस रे मौके जनता ने शुभकामनावां दीनी है। उपराष्ट्रपति सोशल मीडिया रे जरिये कह्यो के ओ दिन खुद रे पाण ऊबा भारत री भावना ऊं अंतरिक्ष हलकां मांय भारत री प्रगति री याद दिरावे है। प्रधानमंत्री मोदी ई सोशल मीडिया पोस्ट रे जरिये कह्यो के देश ने अंतरिक्ष रा हलका मांय हासिल करी ज्यी उपलब्धियां माथे नाज़ है अर ओ दिन भारत रा अंतरिक्ष वैज्ञानिकां रा योगदान री सराहवणा करण रो दिन है।  प्रदेश मांय ई पहला भारतीय अंतरिक्ष दिवस रे मौके न्यारा-न्यारा कार्यक्रम राख्यी ज्या। केंद्रीय संस्कृत महाविद्यालय जयपुर मांय निबंध लेखन अर चित्रकला होड़ राख्यी ज्यी। पीएम श्री केंद्रीय विद्यालयां मांय ई प्रश्नोत्तरी अर चित्रकला समेत न्यारी-न्यारी होड़ां राख र अंतरिक्ष दिवस मनायी ज्यो। पाली रा पी.एम. श्री बांगड़ राजकीय उच्च माध्यमिक विद्यालय मांय प्रोजेक्टर रे मार्फत विद्यार्थियांं ने चंद्रयान-3 रा लैंडर विक्रम रे लारला साल आज ही रा दिन चांद री सतह माथे उतरण अर रोवर प्रज्ञान रा काम रा बारा मांय जाणकारी दीरीजी अर प्रश्न उत्तर री होड़ जीतण वाळां ने ईनाम दिया ज्या। कोटपूतली-बहरोड़ रा पानादेवी मोरीजावाला राजकीय कन्या महाविद्यालय मांय राख्यी ज्या कार्यक्रम मांय विद्यार्थियां ने खास जाणकारी दीरीजी।