रामनवमी रो तिवार दीतवार ने परम्परागत सिरधा रे सागे मणायी ज्यो। यो तिवांर भगवान विष्णु रा सातवां अवतार भगवान राम रा अवतरण रो प्रतीक है। रामनवमी चैत्र माह री नवमी तिथि ने मनायी जावे है। इण मौके प्रदेशभर मांय मेळा, शोभायात्रा अर दूजा धार्मिक कार्यक्रम राख्या जा रह्या है। जयपुर मांय रामनवमी माथे पारम्परिक शोभायात्रा काडी जा री है। इण मांय रंग बिरंगी झांकियां अर लवाजमा शामिल है। केई ठौड़ा माथे शोभायात्रा रो फूलां सूं स्वागत कर्यो जा रह्यो है। इण रे पछे राज्यपाल हरिभाऊ बागड़े अर मुख्यमंत्री भजनलाल शर्मा रो महाआरती मांय शामिल होबा रो कार्यक्रम है। जैसलमेर ज़िला रा रामकुंडा प्राचीन राम मिन्दर मांय मनभावनी सजावट करी गई है। हनुमानगढ़ रा भद्रकाली माता मिन्दर मांय खास पूजा करी जा री है। अठे बडी संख्या मांय सिरधालू दर्शन खातर पूग रह्या है। सवाईमाधोपुर रा चौथ का बरवाड़ा रा चौथ माता मिन्दर मांय सिरधालूआं री भारी भीड उमड़ री है। ब्रज हलका भरतपुर मांय भी रामनवमी उच्छाव रे सागे मनायी जा री है। इण मौके डूंगरपुर मांय शोभायात्रा काडी गयी, जिण मांय 51 घोडा अर लवाजमा रे सागे बडी संख्या मांय थानीय लोग शामिल व्ह्या। नागौर मांय भगवान राम रा जन्मोत्सव री झांकियां री शोभायात्रा काडी गयी। इण मांय अंतरराष्ट्रीय ख्याति प्राप्त रेसलर द ग्रेट खली भी शामिल व्ह्या। पाली मांय सुंवारे प्रभातफेरी अर दोपहर मांय शहर रा खास रास्ता सूं शोभायात्रा काडी गयी। शोभायात्रा मांय कुरीतियां री कानी जाग जगावती झांकियां लोगां ने रिझायी। झालावाड़, चूरू, करौली, बाडमेर, डूंगरपुर, हनुमानगढ़ भीलवाडा अर जालौर मांय भी शोभायात्रा निकाळी ज्यी।