रामदेव जयंती मंगलवार ने प्रदेशभर सिरधाभाव सागे मनायी ज्यी। ईं मौके न्यारी-न्यारी ठोड़ां मेळा भर रह्या है। जैसलमेर ज़िला रा रामदेवरा मांय संवारे ऊं ई पैदल जातरूआं रा जत्था सतरंगी ध्वजा ले र बाबा रा दर्शन सारू पूग रह्या है। चूरू रा जूना रामदेव मिन्दर मांय सोहवणी सजावट करीजी है। श्रीगंगानगर रा रामदेव मिन्दरा मांय मोटी तादाद मांय जातरू पूग्या। तेजादशमी ई उमाव सागे मनायी जा रही है। लोकसभा अध्यक्ष ओम बिरला कोटा रा नान्ता मांय राख्यी ज्या तेजाजी महोत्सव मांय भाग लीनो। म्हाणा नागौर खबरनवीस बतायो के तेजाजी रा जन्म स्थान खरनाल मांय भर रह्या मेळा मांय मोटी तादाद मांय भगत शामिल व्हे रह्या है। ईं मौके पाली मांय भक्ति संध्या राख्यी ज्यी है। ब्यावर मांय भर रह्या तेजाजी रा मेळा मांय कबड्डी, कुश्ती अर वॉलीबॉल समेत न्यारी-न्यारी होडां मांय मोट्यार बढ़-चढ र हिस्सो लीनो। काल जलझूलनी ग्यारस रे मौके केई ठोडां धार्मिक अनुष्ठान अर मेळा राख्या जा रह्या है। म्हाणा चित्तौड़गढ़ खबरनवीस बतायो के सांवलिया सेठ मिन्दर मांय मंगलवार ने तीन दिन रो मेळो सरू व्ह्यो।