मुख्यमंत्री भजन लाल शर्मा कह्यो है के राज्य री मौजूदा सरकार प्रदेश री दिशा अर दशा बदलण री ठोस सरूआत कीनी है। वे शुक्रवार ने जयपुर मांय खबरनवीसां ने वां रा राज रा दो साल रा कामकाज रा बारा मांय विगतवार जाणकारी दे रह्या हा। मुख्यमंत्री कह्यो के वां री सरकार जनता री उम्मीदां माथे खरी उतरण हर संभव कोशिश कर रही है। श्री शर्मा कह्यो के विधानसभा चुनाव ऊं पैली भारतीय जनता पार्टी री ओर ऊं जारी करी ज्या संकल्प पत्र मांय करी ज्या वायदां मांय ऊं 70 फीसदी पूरा व्हे ग्या है या वां माथे काम चाल रह्यो है।
मुख्यमंत्री कह्यो के केंद्र री केई योजनावां ने लागू करण मांय राजस्थान अव्वल या दूजा पायदान माथे है। मुख्यमंत्री कह्यो के पेपरलीक अर भ्रष्टाचार रे खिलाफ सरकार असरदार कार्रवाई कीनी। वे कह्यो के नौजवानां रो भविष्य सुरक्षित करण माथे सरकार रो खास ध्यान है। मुख्यमंत्री लारला दो साल मांय प्रदेश रा बुनियादी ढांचा, निवेश अर उद्योगां ने बधावो देवण सारू करी ज्या कामां री विगतवार जाणकारी दीनी। दूजी कानी कांग्रेस प्रदेश री भजन लाल सरकार रा कामकाज ने नाकाम बतायो।
विधानसभा मांय विपख रा नेता टीकाराम जूली कह्यो के सरकार नौजवानां ने नौकरी देवण ने सब ऊं मोटी उपलब्धि माने है, पण हाल तांई ज्यां नौजवानं ने नौकरी दीरीजी, वां सारू रिक्तियां लारली कांग्रेस सरकार ई निकाळी ही। वे राज्य मांय कानून व्यवस्था अर सरकार री माली हालत माथे ई असंतोष जतायो।
