राज्य री भजन लाल शर्मा सरकार रा दो साल पूरा व्हेवण रा सिलसिला मांय 15 दिन रा कार्यक्रम सरू व्हे ग्या है। ईं रा तैत मुख्यमंत्री भजन लाल शर्मा वां रा दफ़्तर मांय कंपाला, टोक्यो, दोहा, म्यूनिख, न्यूयॉर्क, भुवनेश्वर, न्यूजीलैंड, जांबिया, घाना अर नैरोबी ऊं आया प्रवासी राजस्थानियां सागे बातचीत कीनी। काल राज्य सरकार री ओर ऊँ जयपुर ऊँ प्रदेश रा न्यारा-न्यारा ज़िलां मांय प्रचार रथ भेज्या जावेला। काल ई जयपुर मांय स्टार्टअप कॉन्क्लेव अर आई स्टार्ट कार्यक्रम राख्यो जावेला अर राजस्थान वेन्चर कैपिटल फण्ड री सरूआत करी जावेला। सूचना प्रौद्योगिकी अर संचार आयुक्त हिमांशु गुप्ता बतायो के जयपुर मांय काल व्हेवण वाळा नवाचार दिवस-स्टार्टअप्स एक्सपो मांय स्टार्टअप्स री प्रदर्शनी माथे सगळां रो ध्यान व्हेला। ईं सागे ई आइस्टार्ट राजस्थान कार्यक्रम रा तैत चुणी ज्या स्टार्टअप्स ने फंडिंग रा चैक दिया जावेला। जनवरी, 2026 मांय व्हेवण वाळा ’डिजिफेस्ट’ रा तैत राख्यी जावण वाळी हैकाथॉन ई सरू करी जावेला।