राज्य रा सात विधानसभा हलकां मांय उप चुनाव बाबत् दाखिल करी ज्या नामपानां री सोमवार ने जांच करी ज्यी। आं सात सीटां सारु कुल 118 पर्चा दाखिल करी ज्या हा। निर्वाचन विभाग ऊं मिली जाणकारी रे मुजब 11 नामपाना नामंजूर करी ज्या है, जद के दो पर्चा पाछा ले लिया ज्या। दौसा मांय 4, देवली-उनियारा अर खींवसर मांय 2-2 अर सलूंबर, चौरासी अर झुन्झुनू मांय 1-1 पर्चा नामंजूर कर दिया ज्या। रामगढ़ मांय सगळा 14 पर्चा मंजूर कर लिया ज्या। देवली-उनियारा मांय 2 निर्दलीय उम्मीदवार पर्चा पाछा ले लीना। उम्मीदवार 30 अक्टूबर तांई नाम पाछा ले सके है। आं विधानसभा हलकां मांय उप चुणाव सारू 13 नवम्बर ने वोट पडे़ला। इण ऊं पैली 85 साल ऊं बत्ती उम्र रा बुजुर्ग अर दिव्यांग मतदाता 4 ऊं 8 नवंबर तांई घर ऊं ई वोट दे सकेला। 23 नवम्बर ने वोटां री गिणती करी जावेला। ईं बीचे विधानसभा उप चुणाव री तारीख ज्यों-ज्यों नजदीक आ रही है त्यों-त्यों प्रशासन री तैयारियां ईं ज़ोर पकडबा लागी है। दौसा विधानसभा हलका मांय न्यारी-न्यारी ठौड़ां फ्लैग मार्च निकाळ र वोट देवण वाळा ने हिफ़ाजत रो भरोसो दिरायो जा रह्यो है। फ्लैग मार्च मांय अर्ध-सैनिक बल, राजस्थान पुलिस अर आरएसी रा जवान गश्त कर रह्या है।