राज्य रा लंकाऊ अर ऊगणी हलका मांय बुधवार ने भारी अर कठे-कठे घणी भारी बरसात रा आसार है। मौसम विभाग 31 जुलाई ने उदयपुर, भरतपुर, जयपुर, अजमेर, बीकानेर अर कोटा संभाग मांय कठे-कठे जबरदस्त बिरखा बाबत् चेतायो है। इण ने ध्यान राखता थकां प्रशासन जनता ऊं नदियां रा बहाव हलका रे आरे-सारे नी जावण अर सावचेती राखण री अपील कीनी है। ईं बीचे मंगलवार ने ई केई ठोड़ां हल्की ऊं तेज बिरखा रा समाचार मिल्या है। भरतपुर मांय लारली रात ऊं ही रुक-रुक र बरसात व्हे रही है। म्हाणा खबरनवीस बतायो के लारला दिनां व्ही भारी बारिश रे कारण केई गांव खास गेला ऊं कट ग्या है। मौसम विभाग रे मुजब लारला चौबीस घंटा मांय प्रदेश रा ऊगणी हलका मांय केई ठोड़ां ज़ोरदार मेह बरस्यो। सब ऊं बत्ती 13 सेंटीमीटर बारिश राजधानी जयपुर मांय व्ही, जदके बारां ज़िला रा अटरू मांय 11 सेंटीमीटर बरसात व्ही। लालसोट, बकानी, बिजौलियां अर बहरोड़ मांय ई 5 ऊं 9 सेंटीमीटर बीचे बिरखा व्ही। अलवर, टोंक, भरतपुर, चित्तौडगढ़, अजमेर, सिरोही, झालावाड़, करौली अर सवाईमाधोपुर मांय हल्की ऊं मझला दर्जा री जदके राज्य रा आतूणी हलकां मांय कठे-कठे हल्की बिरखा व्ही। लगातार व्हे रही बारिश ऊं कूड़ा-बावड़ियां, तळावां, नदियां अर बंधां मांय पाणी री चोखी री आवक व्हे रही है। चम्बल नदी मांय पाणी लेवल खतरा रा निशाण ऊं ऊंचो निकळ ग्यो है।