राज्य रा मौसम मांय गुरूवार ने बदलाव निजर आयो। सरहदी ज़िलां बाड़मेर अर जैसलमेर मांय आखा दिन धूळो उड़बा सागे बायरो बाजण ऊँ ज़िन्दगी माथे असर पड़्यो। इण ऊँ जीरा री साखां ने नुकसाण व्हेवण री शंका है। दूजी कानी हनुमानगढ़ अर पाली मांय गहरा बादळा मण्ड्या रहवण ऊँ ठारी बध ग्यी जद के चूरू मांय शीतलहर रो कोप रह्यो। मौसम केंद्र जयपुर रे मुजब काल जयपुर, अजमेर अर भरतपुर संभाग मांय बादळा री गाज सागे बिरखा व्हेवण रा आसार है। ईं सागे ई राज्य रा उत्तराद आतूणी हलकां मांय ओळा पड़बा सारू चेतायी ज्यो है। मौसम महकमो 27 अर 28 जनवरी ने पारो और उतरण रो अन्दाजो लगायो है।