राज्य रा मुख्य निर्वाचन अधिकारी नवीन महाजन कह्यो है के अंता विधानसभा हलका मांय व्हेवण वाळा उपचुनाव सारू सगळा मतदान केंद्र हर भांत ऊं सुलभ बणाया जावेला। वे बतायो के सगळा मतदान केन्द्र ग्राउंड फ्लोर माथे बणाया जावेला अर वठै रैंप मुहैया कराया जावेला। दिव्यांग अर बुजुर्गां ने वोट देवण रा काम मांय प्राथमिकता दी जावेला। दृष्टिहीन मतदातावां सारू ब्रेल लिपि वाळी सूचना पर्चियाँ जारी करी जावेला अर मतदान केन्द्रां माथे ब्रेल डमी बैलेट शीट मुहैया करायी जावेला। दिव्यांग मतदातावां सारू आवण-जावण रो सुबीता ई मुहैया करायो जावेला, ज्यीं सारू वे  ECINET रा सक्षम मॉड्यूल माथे नाम मंडा सके है। ईं बीचे उपचुनाव सारू बुधवार ने दो और पर्चा दाखिल करी ज्या। कांग्रेस रा प्रमोद जैन बुधवार ने दोबारा पर्चा दाखिल कीनो। इण ऊं पैली राख्यी ज्यी नामांकन रैली मांय पैली वाळा मुख्यमंत्री अशोक गहलोत समेत कांग्रेस रा केई नेता शामिल व्ह्या।