राज्य रा पुलिस महकमा मांय न्यारी-न्यारी भर्तियां मांय महिलावां ने 33 फीसदी आरक्षण दियो जावेला। ईं सारू कैबिनेट राजस्थान पुलिस अधीनस्थ सेवा नियम 1989 मांय बदलाव करण री मंजूरी दे दीनी है। मुख्यमंत्री भजन लाल शर्मा री सदारत मांय बुधवार ने जयपुर मांय व्ही कैबिनेट री मीटिंग मांय ओ फैसलो करी ज्यो। मीटिंग पाछे उप मुख्यमंत्री प्रेम चंद बैरवा अर संसदीय कार्य मंत्री जोगाराम पटेल खबरनवीसां ने मीटिंग माय करी ज्या न्यारा-न्यारा फैसलां री जाणकारी दीनी। बैरवा कह्यो के महिलावां ने पुलिस री नौकरी मांय 33 फीसदी आरक्षण देवणो महिलावां ने मजबूत बणावण री दिशा मांय मोटो कदम है। उपमुख्यमंत्री बैरवा बतायो के राज्य सरकार रा कर्मचारियां रा रिटायरमेंट ऊं जुड़्या नियमां मांय ई बदलाव कर्यो जावेला। मंत्री जोगाराम पटेल बतायो के सरकार भाजपा रा संकल्प पत्र मांय करी ज्या वायदा धीरे-धीरे पूरा कर रही है। वे बतायो के प्रदेश ने बिजली बणावण रा मामला मांय खुद रे पाण ऊबो करण सारु कैबिनेट सूरज री रोशनी ऊं 3 हजार 150 मेगावाट बिजली बणावण री परियोजनावां सारु जमीन आवंटन री मंजूरी ई दे दीनी।