राज्य रा न्यारा-न्यारा हलकां मांय व्हे रही ज़बरदस्त बिरखा ऊं जिंदगी माथे घणो असर पड़्यो है। जोधपुर अर उदयपुर संभाग मांय लारला दो दिन ऊं व्हे रही जबरदस्त बिरखा ऊं हालात बेकाबू व्हेवण लाग्या है। जोधपुर मांय व्हे रही भारी बारिश ऊं चामुंडा नदी मांय पाणी उफण रह्यो है। जोधपुर-जैसलमेर बीचे जोधपुर ग्रामीण जिला रा तिंवरी अर मांडियाई कने रेलवे लेण हेटे ऊं मिट्टी बह जावण रे कारण पटरियां ने नुकसाण व्ह्यो है। ई कारण पांच रेल गाड़ियां रद्द कर दीरीजी है जद के कुछ गाड़ियां आंशिक तरीका ऊं रद्द करी ज्यी है अर कुछ गाड़ियां दूजा गेला ऊं चलायी जा रही है। जोधपुर शहर मांय ई मूसलाधार बारिश रे कारण नीचला हलकां मांय पाणी भर ग्यो है। बाड़मेर मांय बुधवार ने लगातार दूजा दिन व्ही जोरदार बिरखा ऊं नीचला हलकां मांय पाणी भर ग्यो। बालोतरा जिला रा सिवाना अर सिणधरी मांय ई ज़ोरदार मेह बरस्यो। उदयपुर संभाग मांय ई व्हे रही तेज़ बिरखा ऊं आवण-जावण माथे असर पड़्यो है। उदयपुर-अहमदाबाद नेशनल हाईवे माथे बुधवार ने गाड़ियां री लम्बी लेणां लाग ग्यी। तीन दिन ऊं लगातार व्हे रही बरसात रे कारण उदयपुर मांय स्वरूपसागर अर उदयसागर रा दरूजा खोल र बत्तो पाणी निकाळ्यो जा रह्यो है। बांसवाड़ा रा माही बजाज सागर बंधा ऊं ई काल ऊं ही पाणी निकाळ्यो जा रह्यो है। धौलपुर ज़िला रा पार्वती बंधा रा ई 2 दरूजा खोल र बत्तो पाणी निकाळ्यो जा रह्यो है। चित्तौड़गढ़ ज़िला रा गंभीरी बांध रा ई चार दरूजा खोल र बत्तो पाणी निकाळ्यो जा रह्यो है अर ईं माथे करीब डोढ़ फीट री चादर चाल रही है। जल संसाधन विभाग जनता ऊं गंभीरी नदी रा किनारां ऊं दूर रहवण री अपील कीनी है। टोंक अर बूंदी समेत केई जिलां मांय नदियां मांय पाणी रो लेवल लगातार बध रह्यो है। राजधानी जयपुर रा केई हलकां मांय ई बुधवार ने बिरखा व्ही। सीकर मांय 36 घंटा ऊं रूक-रूक र व्हे रही बिरखा रे कारण जिन्दगी माथे असर पड्यो है। सांचौर जिला मांय चितलवाना कने शिवपुरा मांय लूणी नदी मांय फंसी भैंस निकाळबा सारू उतर्यो एक जणो बह ग्यो, जिण री एसडीआरएफ टीम तलाश कर रही है। मौसम केंद्र जयपुर रा निदेशक राधेश्याम शर्मा बतायो के बुधवार ने जोधपुर, उदयपुर, कोटा अर अजमेर संभाग मांय कठे-कठे ज़ोरदार तो कठे-कठे घणी ज़ोरदार बिरखा रा आसार है। जयपुर, भरतपुर अर बीकानेर संभाग रा कुछ हलकां मांय ई बिरखा री संभावना है। वे बतायो के प्रदेश रा घणखर हलकां मांय आवता चार-पांच दिन चौमासा री बिरखा चालती रेहवण रा आसार है।