राज्य रा घणखर हलकां मांय लारला दो-तीन दिन ऊं व्हे रही ज़ोरदार बिरखा रे कारण जिं़दगी माथे असर पड़ रह्यो है। बरसात रे कारण केई ठोड़ा नीचला हलकां मांय पानी भर ग्यो है, जद के नदी-नाळां मांय उफण रह्या पाणी ऊं केई गेला बंद व्हे ग्या है। डीग रा सरकारी अस्पताल मांय पाणी भर जावण ऊं मरीज़ां अर इलाज करण वाळां ने परेशानी रो सामो करणो पड़् रह्यो है। अलवर मांय रूपारेल नदी माथे रपट चालण ऊं विद्यार्थियां ने परेशानी व्ही। आज सिलीसेढ़ झील अर मूसी महारानी छतरी कने रा सागर तळाव ऊं ई पाणी निकळबा लाग ग्यो। हनुमानगढ़ ज़िला मांय ई घग्घर नदी मांय पाणी रा लगातार बध रह्या लेवल ने ध्यान राखता थकां प्रशासन सावचेत व्हे ग्यो है। अजमेर मांय काल रात ऊं सरू व्ह्यो बिरखा रो दौर आज ई चालतो रह्यो। ज़िला कलेक्टर न्यारा-न्यारा हलकां रो दौरो कर र हालात रो जायज़ो लीनो। भीलवाड़ा रा ज़िला कलेक्टर ई जनता ऊं बिरखा रे दौरान घर मांय ई रहवण री अपील कीनी है। बांसवाड़ा मांय ई कदे तेज़ तो कदे हल्की बरसात रो सिलसिलो चाल रह्यो है। ज़िला रा सज्जनगढ़ मांय जकोड़िया नदी रा तेज़ बहाव मांय एक कार बह ग्यी, जिण ने गांव वाळां री मदद ऊं बाहर निकाळी ज्यी। म्हाणा खबरनवीस बतायो के माही बंधा मांय लगातार आ रह्या पाणी ने ध्यान राख्ता थकां ईं रा 16 दरूजा खोल र बत्तो पाणी निकाळ्यो जा रह्यो है।
मौसम विभाग आवता तीन-चार दिन राज्य रा लंकाऊ-ऊगणी हलकां मांय भारी बारिश रा आसार जताया है। ईं दौरान कोटा अर उदयपुर संभाग मांय कठे-कठे घणी भारी बिरखा व्हे सके है। मौसम विभाग गुरूवार ने राजधानी जयपुर समेत 18 ज़िलां मांय बरसात रो ऑरेंज अलर्ट जारी कीनो है। ईं सागे ई 15 ज़िलां मांय बारिश रो येलो अलर्ट जारी करी ज्यो है। महकमा रे मुजब शुक्रवार ने ऊं जोधपुर अर बीकानेर संभाग रा कुछ हलकां मांय बिरखा रा ज़ोर बधबा रा आसार है।