प्रदेश मांय 1 जून ऊं हाल तांई सामान्य ऊं 133 फीसदी बत्ती बिरखा व्ही है। मौसम विभाग सोमवार ने 27 जिलां मांय बरसात रा आसार जताया है। बूंदी अर टोंक ज़िलां सारू घणी जोरदार बारिश रो रेड अलर्ट, जदके भीलवाड़ा, चित्तौड़गढ़, दौसा, करौली, कोटा, सवाईमाधोपुर अर जयपुर जिलां मांय बादळां री गाज अर ज़ोरदार बायरो बाजण सागे बरसात व्हेवण रो ऑरेंज अलर्ट जारी करी ज्यो है। अजमेर, बारां, भरतपुर अर धौलपुर समेत केई ज़िलां मांय ई बरसात रो येलो अलर्ट जारी करी ज्यो है। ईं बीचे राजधानी जयपुर, सीकर अर नागौर मांय सोमवार ने संवारे चोखो मेह बरस्यो। चूरू ज़िला रा सरदारशहर मांय तेज अंधड़ सागे घणो पाणी बरस्यो। हनुमानगढ़, श्रीगंगानगर, सवाईमाधोपुर अर झुंझुनूं समेत केई ज़िलां मांय आखा दिन रिमझिम बरसात व्हेती रही। लारला चौबीस घंटा मांय सब ऊं बत्तो 10 सेंटीमीटर पाणी धौलपुर ज़िला रा बाड़ी मांय बरस्यो। म्हाणा खबरनवीस बतायो के तेज़ बारिश ऊं केई ठोड़ा पाणी भर ग्यो है।
बारां, टोंक, झालावाड, बूंदी, सिरोही, पाली अर राजसमंद मांय ई चोखी बिरखा व्ही। घणी बिरखा रे कारण बारां मांय पार्वती नदी रा टापू माथे कुछ लोग फंस ग्या। जाणकारी मिलता ई एसडीआरएफ री टीम मौके पूग र फंस्या लोगां ने दूजी ठोड़ां पूगाया। हाड़ौती हलका मांय लारला चार दिन ऊं व्हे रही ज़ोरदार बिरखा ऊं चंबल, कालीसिंध, परवन, पार्वती अर वां री सहायक नदियां मांय ई पाणी रो लेवल तेज़ी ऊं बध रह्यो है। चंबल नदी माथे बण्या तीन ई बंधां ऊं पाणी निकाळ्यो जा रह्यो है।
प्रदेश मांय लगातार व्हे रही बिरखा ऊं केई ठोड़ां नदी-नाळा उफणबा लाग्या है। बूंदी रा गुड़ा, जयपुर रा छापरवाड़ा, भीलवाड़ा रा मेजा अर दौसा रा मोरेल बंधा समेत केई नदी-नाळा मांय चोखो पाणी आ रह्यो है। जयपुर मांय 15 जून ऊं बाढ़ नियंत्रण कक्ष काम कर रह्या है। जयपुर नगर निगम ग्रेटर री महापौर डॉ. सौम्या गुर्जर आं केन्द्रां रो सोमवार ने औचक दौरो कीनो। वे अहलकारां ने आपदा रा हालात मांय सावचेत रेहवण बाबत् कह्यो। महापौर आं केन्द्रां माथे रेत रा कट्टां समेत ज़रुरी साधनां री व्यवस्था करण रा हुकम ई दीना।