राज्य रा घणखर हलकां मांय काल ऊं भारी बारिश ऊं साता मिलण रा आसार है, हालांकि 3 अगस्त ऊं नुवो परिसंचरण तंत्र बणबा ऊं 6 अगस्त तांई भरतपुर अर जयपुर संभाग मांय ज़ोरदार मेह बरसबा री संभावना है। ईं बीचे श्रीगंगानगर मांय मोड़ी रात सरू व्ही बिरखा आज ही चालती रही। सिरोही जिला मांय ई केई ठोड़ां रिमझिम बिरखा व्ही। लारला 24 घंटां मांय घणखर ठोड़ां हल्की ऊं मझला दर्जा री बरसात व्ही, जदके कठे-कठे ज़ोरदार मेह बरस्यो। चूरू जिला रा तारानगर मांय सब ऊं बत्ती 19 सेंटीमीटर बरसात व्ही। ज़िला रा राजगढ़, रतनगढ़, सुजानगढ अर सादुलपुर मांय ई झमाझम बरसात व्ही। हनुमानगढ़ ज़िला रा नोहर मांय 14 अर श्रीगंगानगर रा अनूपगढ़ मांय 13, धौलपुर रा सरमथुरा अर सीकर रा रामगढ़ शेखावतान मांय 12-12 सेंटीमीटर पाणी बरस्यो। धौलपुर मांय पार्वती नदी मांय घणो पाणी उफण रह्यो है। गृह राज्यमंत्री जवाहर सिंह बेढम धौलपुर मांय भारी बारिश रा असर वाळा हलकां रो आज दौरो कीनो। वे जनता ऊं बातचीत कर र समस्यावां सुणी अर अहलकारां ने ज़रूरी हुकम दीना।