राज्य रा केई हिस्सां मांय बुधवार ने हल्की बारिश व्ही। सवाईमाधोपुर, करौली, जालौर, बाड़मेर अर आरे-सारे रा हलकां मांय दोपहरां पाछे व्ही बिरखा ऊं लोगां ने उमस अर गर्मी ऊं थोड़ी साता मिली। बांसवाड़ा ज़िला मांय दो दिन ऊं व्हे रही बिरखा ऊं माही बजाज सागर बंधा मांय लगातार पाणी आ रह्यो है। म्हाणा खबरनवीस बतायो के बत्तो पाणी निकाळबा सारू माही डेम परा 16 दरूजा खोल्या जा रह्या है। मौसम महकमा रे मुजब लारला चौबीस घंटा मांय राज्य रा ऊगणी हलका मांय कठे-कठे चोखो मेह बरस्यो, जद के आतूणी हलका मांय हल्की बरसात व्ही। सब ऊं बत्तो 10 सेंटीमीटर पाणी बांसवाड़ा ज़िला रा लोहारिया मांय बरस्यो। दूजी कानी आतूणी हलका मांय पड़ रही ज़ोरदार गर्मी बीचे बाड़मेर मांय पारो 40 डिग्री सेल्सियस कने पूग ग्यो। जैसलमेर, जोधपुर, बीकानेर, चूरू, श्रीगंगानगर अर नागौर समेत केई ठोडां दिन री बगत पारो 36 डिग्री सेल्सियस ने पार कर ग्यो।