राज्य मांय केई ठोडां मौसम ओजू बदल्यो है अर जयपुर समेत ऊगणी हलका रा ज़िलां मांय केई ठोडां बादळा मंड्या रह्या। भरतपुर मांय दोपहरां पाछे छांटो-छिड़को व्ह्यो। पाली अर जालौर मांय मौसम सुहावणो रह्यो। सरहदी जिलां जैसलमेर अर बाड़मेर मांय आखा दिन बादळा मंड्या रह्या। मौसम केंद्र जयपुर रे मुजब बीकानेर, श्रीगंगानगर, हनुमानगढ़, चूरू, झुंझुनूं अर सीकर ज़िलां मांय आवता दो दिन आंधी चालण अर बिरखा व्हेवण रा आसार हैं। ईं रे अलावा न्यारा-न्यारा ज़िलां मांय पारा मांय उतार-चढ़ाव री संभावना है। महकमा रे मुजब राज्य रा आतूणी हलकां मांय गर्मी रो असर और बधबा री संभावना है।