प्रदेश रा ऊगणी हलकां मांय तेज़ बरसात रो सिलसिलो चाल रह्यो है। कठे-कठे भारी बरसात व्ही। मौसम विभाग रे मुजब कोटा रा रामगंज मण्डी मांय सब ऊं बत्ती सवा सात इंर्च बरसात व्ही। सरमथुरा मांय 9, असनावर मांय 8, लालसोट मांय 6, नागौर मांय 5, इंदरगढ, गंगरार, हिंडौली अर गोविंदगढ मांय 4-4 सेंटीमीटर पाणी बरस्यो। राज्य मांय गुरूवार ने ई केई ठौड़ां मेह बरस्यो। पाली मांय एक घंटा तांई ज़ोरदार मेह बरस्यो। राजधानी जयपुर मांय आखा दिन रूक-रूक र हल्की बरसात व्ही। कोटपूतली-बहरोड़ मांय दोपहरां पाछे केई ठौड़ां रिमझिम बिरखा व्ही। श्रीगंगानगर मांय ई बरसात रा समाचार है। मौसम विभाग राज्य रा ऊगणी हलका मांय ज़ोरदार मेह रा आसार जताया है। मौसम केन्द्र जयपुर रा निदेशक राधेश्याम शर्मा बतायो के गुरूवार ने कोटा अर भरतपुर संभाग मांय कठे-कठे भारी बिरखा व्हे सके है। काल ई आ संभागां मांय कठे-कठे भारी ऊं घणी भारी बरसात रो अन्दाजो है। ईं बीचे लोकसभा अध्यक्ष ओम बिरला गुरूवार ने कोटा ज़िला रा रामगंजमण्डी मांय भारी बारिश रा असर वाळा हलकां रो दौरो कीनो। वे अहलकारां ने राहत रा कामां मांय तेज़ी लावण रा हुकम दीना। श्री बिरला न्यारा-न्यारा हलकां मांय पाणी भरण ने ध्यान राखता थकां जरूरी कार्य योजनां बणावण सारू कह्यो।