राज्य रा ऊगणी हलका मांय घणखर ठोड़ां आवता पांच-छह दिन तांई मझला ऊं भारी अर कठे-कठे घणी भारी बिरखा रा आसार है। दूजी कानी जोधपुर अर बीकानेर संभाग मांय आवता दो दिन बिरखा रो ज़ोर कम पड़बा री संभावना है। ईं बीचे लारला चौबीस घंटां मांय जयपुर, अजमेर, उदयपुर, कोटा, भरतपुर अर जोधपुर संभाग अर शेखावाटी अंचल मांय कठे-कठे ज़ोरदार मेह बरस्यो। सब ऊं बत्ती करीब 18 सेंटीमीटर बारिश दौसा मांय दर्ज करीजी। जल संसाधन विभाग ऊं मिली जाणकारी रे मुजब झालावाड़, जयपुर, करौली, भीलवाड़ा, नागौर अर हनुमानगढ़ मांय ज़ोरदार बिरखा व्ही। राज्य रा ऊगणी अर आतूणी हलकां मांय घणखर ठोड़ां हल्की ऊं मझला दर्जा री बिरखा व्ही। ईं दफा चौमासा री चोखी बिरखा ऊं राज्य रा छोटा-मोटा 693 बंधां मांय ऊं 384 पूरा भर ग्या है, जद के 193 थोड़ा-घणा भर्या है। म्हाणा खबरनवीस बतायो के नदी-नाळां अर बंधां मांय पाणी रा बधता लेवल अर खतरा री शंका ने ध्यान राखता थकां प्रशासन री ओर ऊं जनता ऊं तेज बहाव वाळा हलकां ऊं दूर रेहवण री अपील करी जा रही है।