राज्य रा ऊगणी हलका मांय आवता तीन दिन कठे-कठे बिरखा मांय बधोतरी रा आसार है, जदके आतूणी हलका मांय 12 जुलाई ऊं बरसात मांय बधोतरी री संभावना है। कोटा संभाग मांय बुधवार ने कठे-कठे भारी बारिश व्हेवण रो अंदाजो है। ईं बीचे मंगलवार भरतपुर, कोटा, उदयपुर, जयपुर अर बीकानेर संभाग मांय केई ठोडां हल्की ऊं मझला दर्जा री बरसात रो अनुमान है। श्रीगंगानगर मांय दोपहरां पाछे बिरखा व्ही। राजधानी जयपुर, बाड़मेर अर सवाईमाधोपुर समेत कठे-कठे रिमझिम बारिश रा समाचार है। लारला चौबीस घंटा मांय सब ऊं बत्तो 10 सेंटीमीटर पाणी बिजयनगर मांय बरस्यो। भीलवाड़ा रा आसींद, बारां रा छीपाबड़ोद, जयपुर रा पावटा, अजमेर रा भिनाय अर श्रीगंगानगर रा पदमपुर अर सूरतगढ़ मांय चोखी बिरखा व्ही। प्रदेश रा छोटा-मोटा 692 बंधा मांय ऊं 68 पूरा भर ग्या है, जदके 404 बंधा थोड़ा घणा भर्या है।