मौसम विभाग थावर अलवर, करौली, भरतपुर, दौसा अर धौलपुर मांय तेज़ बिरखा व्हेवण सारू चेतायो है, जद के भरतपुर अर जयपुर संभाग रा कुछ हलकां मांय काल ऊं बिरखा मांय ओजू बधोतरी व्हेवण रा आसार है। मौसम केन्द्र जयपुर रा निदेशक राधेश्याम शर्मा बतायो के 4 अगस्त ने भरतपुर संभाग अर आरे-सारे रा हलकां मांय कठे-कठे घणी जोरदार बिरखा व्हे सके है, जद के जोधपुर अर बीकानेर संभाग रा घणखर हलकां मांय आवता एक सप्ताह तांई बिरखा रो ज़ोर कम रहवण री संभावना है। ईं बीचे लारला चौबीस घंटां मांय सब ऊं बत्ती 16 सेंटीमीटर बिरखा श्रीगंगानगर मांय व्ही। हनुमानगढ़ ज़िला रा गोलूवाला मांय ई 15 सेंटीमीटर ऊं बत्तो पाणी बरस्यो। भरतपुर, कोटा, सीकर, डूंगरपुर, भीलवाड़ा अर सिरोही मांय ई 2 ऊं 5 सेंटीमीटर तांई मेह व्ह्यो। राज्य मांय एक जून ऊं एक अगस्त तांई 403 मिलीमीटर बारिश व्ही है जो पूरा चौमासा मांय व्हेवण वाळी बिरखा रो करीब 94 फीसदी है। प्रदेश मांय व्हे रही चौखी बिरखा ऊं बंधां ई तीन चौथाई ऊं बत्ता भर ग्या है। 693 मांय ऊं 260 बंधा पूरा भर ग्या है। ईं बीचे लगातार बरस रह्या पाणी ने ध्यान राखता थकां जयपुर मांय बणायी ज्यो केन्द्रीय बाढ़ नियंत्रण कक्ष चौकस है अर भारी बारिश वाळा ज़िलां रा हालात माथे लगातार निजर राख रह्यो है। ज़ोरदार बिरखा रे कारण भरतपुर ज़िला रा भुसावर हलका रा बोराज गांव मांय एक मकान ढ़स जावण ऊं लोग-लुगाई रा एक जोड़ा री मौत व्हे ग्यी। हनुमानगढ़ ज़िला रा ऊदासर गांव मांय एक कच्चा मकान री छत पड़ जावण ऊं एक टाबरी री मौत व्हे ग्यी।