राज्य मांय सितम्बर महीना रा सरूआती दिनां मांय चौमासा री चोखी बिरखा व्हेवण रा आसार है। मौसम विभाग रे मुजब ईं दौरान कठे-कठे भारी बारिश व्हे सके है। थावर ने जयपुर, अजमेर, जोधपुर अर उदयपुर संभाग रा कुछ हलकां मांय गरज सागे बरसात री संभावना है। सिरोही, जालौर अर पाली मांय तेज़ बरसात रो ऑरेंज अलर्ट जद के 34 जिलां सारू येलो अलर्ट जारी करी ज्यो है। राज्य रा ऊगणी हलका मांय आवता 5-6 दिन हल्की ऊं मझला दर्जा री अर लंकाऊ अर लंकाऊ-ऊगणी हलका मांय कठे-कठे भारी बारिश व्हे सके है। ईं बीचे जैसलमेर, बाड़मेर अर बीकानेर ज़िलां मांय गर्मी अर उमस रा असर बीचे दिन रो तापमान 38 डिग्री सेल्सियस ऊं ऊंचो दर्ज कर्यो जा रह्यो है। इंर् बीचे थावर ने श्रीगंगानगर मांय दोपहरां पाछे झमाझम बिरखा व्ही। जालौर ज़िला रा भीनमाल, रानीवाड़ा, सांचौर अर सायला समेत केई ठौड़ा चोखो मेह बरस्सो। हनुमानगढ़ मांय व्ही ज़ोरदार बारिश रे कारण केई ठौड़ां पाणी भर ग्यो। सलूम्बर ज़िला री जयसंमद झील, सराड़ा हलका रा केजड़ अर हरसन तळाव अर डाया बांध मांय ई लगातार पाणी आ रह्यो है। चोखी बिरखा रे कारण राज्य रा 353 बंधा पूरा भर ग्या है, जद के 219 बंधा थोड़ा घणा भर्या है।