राज्य मांय विधानसभा री सात सीटां माथे होबा वाळा उपचुनाव रे दौरान साफगोई सूं चुनाव करबा खातर आदर्श आचार संहिता री कड़ाई सूं पालना करी जा री है। चुनाव रे दौरान गैर कानूनी नकदी, शराब, नशीला पदार्थ अर दूजी चीजां रे मुफ्त बांटबा माथे कड़ी निजर राखी जा री है। न्यारी न्यारी प्रवर्तन एजेंसियां अर निगरानी दल इण चीजां री धरपकड़ खातर मुश्तैदी सूं काम कर री है। 7 जिला मांय हाल तांई कुल 92 करोड़ 68 लाख रुपया री नकदी अर गैर कानूनी शराब समेत दूजी सामग्री पकड़ी गई है। मुख्य निर्वाचन अधिकारी नवीन महाजन बताया के निर्वाचन आयोग रा निर्देशां रे मुजब कार्यवाही करता थकां राज्य पुलिस सब ऊं बत्ता 76 करोड़ रुपया रा मोल री जब्ती करी है। वे बताया के सगळी सभी एजेंसियां 7 जिलां मांय कुल मिलाकर 4 करोड़ 22 लाख रुपया रा नकद रोकडा पकड्या है। इण दौरान साढे 5 करोड़ रुपया सूं बत्ता मोल री गैर कानूनी शराब अर 42 लाख रुपया कीमत री नशीली चीजां भी जब्त करी गई। करीब सवा करोड़ रुपया रा सोना-चांदी अर दूजा सामान बरामद कर्या गया है। प्रदेश मांय उपचुनाव वाळा विधानसभा हलका मांय मतदाता जागरुकता खातर न्यारा न्यारा कार्यक्रम व्हे रिया है। दौसा मांय जिला स्वीप टीम एक संस्था री इमदाद सूं मतदाता जागरुकता कार्यक्रम राख्यो। इण मांय नुक्कड़ नाटक “लोकतंत्र में नारी की भूमिका“, मतदान गीत री प्रस्तुति दीनी।
डूंगरपुर जिला रा चौरासी विधानसभा हलका मांय चुनाव री तैयारी बाबत जिला निर्वाचन अधिकारी अंकित कुमार सिंह सगळा प्रकोष्ठ रा प्रभारी अधिकारियां अर सहायक प्रभारी अधिकारियां री बैठक ली। कलेक्ट्रेट सभागार मांय व्ही इण बैठक मांय जिला निर्वाचन अधिकारी हाल तांई करया गया कामां री जाणकारी ली।
000