राज्य मांय लारला 24 घंटां मांय पारो थोड़ो चढ़बा ऊँ सर्दी ऊँ थोड़ी साता मिली है। बीती रात केई ठौड़ां पारो चढ़्यो जद के आज दिन मांय ई पारो चढ़्यो। केई ठौड़ां दिन की बगत तापमान 25 डिग्री सेल्सियस ऊँ ऊंचो दर्ज करी ज्यो जद के चार ठौड़ां रात री बगत तापमान 5 ऊँ 9 डिग्री सेल्सियस बीचे मापी ज्यो। कठे-कठे घणी ठण्ड जद के राज्य रा उतराद हलकां मांय धुंअर रही। मौसम विभाग राज्य रा उतराद हलका मांय कठे-कठे बादळा मण्ड्या रेहवण रा आसार जताया है। महकमा रे मुजब आवता 48 घंटां मांय रात री बगत पारो 2 ऊँ 3 डिग्री सेल्सियस चढ़बा री संभावना है।