प्रदेश मांय मंगलवार ने पशु कल्याण पखवाड़ो सरू व्हेला। पशुपालन मंत्री जोराराम कुमावत बतायो के 30 जनवरी तांई चालण वाळा ईं पखवाड़ा मांय ढांढां मांय बांझपन दूर करण अर ऑपरेशन रा शिविर लगा र बत्ता ऊं बत्ता जिनावरां रो ईलाज कर्यो जावेला। ईं सागे ई संगोष्ठियां राख र जिनावरां री बीमारियां रे बारा मांय जाणकारी दी जावेला। ईं रे अलावा पशु क्रूरता निवारण रा उपाय अर उचित पशु प्रबन्धन रा बारा मांय ई बतायो जावेला। श्री कुमावत बतायो के पखवाड़ा रे दौरान स्कूल-कॉलेजां मांय जीव जन्तुआं रा प्रति दया अर प्रेमभाव जगावण सारू काम कर्यो जावेला अर पशु कल्याण रा बारा मांय भांत-भांत री होड़ां राख्यी जावेला।