राज्य मांय भारी बिरखा रो दौर फिलहाल मंदो पड़ ग्यो है, हालांकि केई ठोडां हल्की ऊं मझला दर्जा री बिरखा व्हे रही है। मंगलवार ने अलवर, भरतपुर, धौलपुर, दौसा अर करौली जिलां सारू बिरखा रो येलो अलर्ट जारी करी ज्यो है। मौसम विभाग राज्य रा उतराद-ऊगणी हलकां मांय आवता तीन-चार दिन कठे-कठे हल्की ऊं मझला दर्जा री बरसात रा आसार जताया है। राज्य रा आतूणी हलका मांय आवता पांच-छह दिन तांई कठे-कठे हल्की बारिश रो अनुमान है। ईं बीचे लारला चौबीस घंटा मांय सब ऊं बत्तो 5 सेंटीमीटर पाणी भरतपुर जिला रा बयाना मांय बरस्यो। ईं रे अलावा दौसा, धौलपुर, प्रतापगढ़ अर बारां जिलां मांय ई कठे-कठे 1 ऊं 4 सेंटीमीटर तांई मेह बरस्यो। म्हाणा उदयपुर खबरनवीस बतायो के तेज बारिश रो दौर मंदो पड़बा रे बावजूद वठे मोटी तादाद मांय सैलाणी पूग रह्या है।