पौष महीना मांय अब संवारे अर सिंज्यां री पोर तेज ठण्ड महसूस व्हेवण लागी है। लारली रात डूंगरपुर मांय सब ऊं कम 5 दशमलव 4 डिग्री सेल्सियस न्यूनतम तापमान दर्ज करी ज्यो। अलवर मांय छह, करौली मांय 6 दशमलव 2 अर दौसा मांय 6 दशमलव 4 डिग्री सेल्सियस तापमान नापी ज्यो। हालांकि घणखर ठौड़ां दिन री बगत पारो 25 ऊं 30 डिग्री सेल्सियस बीचे रिकॉर्ड कर्यो जा रह्यो है। भरतपुर अर डीग ज़िलां मांय संवारे री पोर ठण्ड और धुंअर रो असर महसूस कर्यो जा रह्यो है। म्हाणा भरतपुर खबरनवीस बतायो के लोग ठण्ड ऊं बचाव सारू अलाव तापण लाग्या है। मौसम केंद्र जयपुर रे मुजब आवता दो दिन मांय पारो 3 डिग्री सेल्सियस तांई चढ़बा रा आसार है। 23 अर 24 दिसम्बर ने राज्य रा उतराद अर आतूणी हलका मांय घणी धुंअर रेहवण रा आसार है, हालांकि 24 दिसम्बर पाछे तापमान मांय 2 ऊं 3 डिग्री सेल्सियस तांई गिरावट रा आसार है।