राज्य सरकार पुलिस ने और बेहतर बणावण अर बुनियादी ढांचा विकास सारू 200 करोड़ रुप्या रो खजानो बणावेला। ईं सागे ई साढ़े 3 सौ करोड़ रूप्या रा खर्च ऊं सरदार पटेल सेंटर फॉर साइबर कंट्रोल अर राजस्थान पुलिस तकनीकी प्रशिक्षण अकादमी खोली जावेला। मुख्यमंत्री भजनलाल शर्मा गुरूवार ने जयपुर मांय राख्यी ज्या पुलिस रा अहलकारां रा राज्य स्तर रा सम्मेलन मांय आ जाणकारी दीनी। वे कह्यो के राज्य मांय लारला साल रे मुकाबले अपराधां मांय 15 फीसदी री कमी आई है। मुख्यमंत्री पुलिस रा अहलकारां ने आवता युवा दिवस रे मौके विद्यार्थियां ने पुलिस थाणां रो दौरो करावण अर वां ने नुवा कानूनां री जाणकारी देवण रा हुकम दीना। सम्मेलन रे दौरान ई-विजिटर्स पोर्टल अर ई-जीरो एफआईआर रो सुबीतो सरू करी ज्यो। राजस्थान पुलिस अकादमी ने देश रा सब ऊं बेहतर प्रशिक्षण संस्थान रो दर्जो मिलण परां मुख्यमंत्री पुलिस ने बधाई दीनी। श्री शर्मा पुलिस ने जनता मांय भरोसो कायम करण बाबत् कह्यो। ईं दौरान पुलिस महानिदेशक राजीव शर्मा कह्यो के ओ सम्मेलन विकसित भारत थीम माथे राख्यो जा रह्यो है।