राज्य मांय नुवा साल री अगुवानी सारु सैर-सपाटा री न्यारी-न्यारी ठौड़ां मोटी तादाद मांय सैलाणी पूग रह्या है। जयपुर, जैसलमेर, जोधपुर अर उदयपुर समेत सैर-सपाटा री खास ठौड़ां चार ऊं मेर सैलानी निजर आ रह्या है। जयपुर मांय हिफाज़त सारु पुलिस तीन स्तर री गश्त करेला। शहर मांय 45 और पुलिस नाका लगायी ज्या है। यातायात पुलिस रा डी.सी.पी. सुमित मेहरड़ा बतायो के नुवा साल रा कार्यक्रमां ने ध्यान राखता थकां आवण-जावण रा खास इंतज़ाम करी ज्या है। धार्मिक ठौड़ां ई खास इंतज़ामात करी ज्या है। खाटूश्यामजी मिंदर रा गेला मांय गाड़ियां नीं ले जायी जा सकेला अर वठे पुलिस रा तीन हजार कर्मचारी तैनात करी ज्या है। जयपुर रा गोविंददेवजी मिंदर मांय जातरूआं रा सुबीता सारु दर्शन रो बगत बधाई ज्यो है। झुंझुनूं ज़िला रा मंडावा री हवेलियां अर भींतां माथे मांडणा ने निरखण सारु मोटी तादाद मांय देसी-परदेसी सैलाणी पूग रह्या है। वठे लोक संगीत अर पारंपरिक कार्यक्रमां री तैयारियां ई करी जा रही है। झुन्झुनू रा एस.पी. ब्रजेश ज्योति उपाध्याय बतायो के नुवा साल रा जश्न रे मौके जनता री मदद सारु पुलिस री ओर ऊं पुख्ता व्यवस्था करी ज्यी है।